چیئرمین سینیٹ کی قائمہ کمیٹی برائے دفاعی پیداوار سینیٹر محمد عبدالقادر نے کہا ہے کہ برآمدات میں بہتری خوش آئند ہے، تاہم ملکی تجارتی خسارے میں اضافہ سنجیدہ توجہ اور موثر معاشی اقدامات کا متقاضی ہے۔ حکومت کو برآمدی صنعتوں کی مسابقت بڑھانے، مقامی پیداوار کو فروغ دینے اور درآمدی انحصار میں بتدریج کمی کے لیے مربوط حکمتِ عملی اختیار کرنا ہوگی۔یہاں جاری ہونے والے ایک بیان میں انہوں نے کہا کہ ادارہ شماریات کے جاری کردہ اعداد و شمار کے مطابق رواں مالی سال 2026–27 کی پہلی سہ ماہی، جولائی تا ستمبر، میں اشیا کی تجارت کا خسارہ گزشتہ سال کی اسی مدت کے مقابلے میں 15.13 فیصد بڑھ کر 10 ارب 79 کروڑ 20 لاکھ ڈالر ہو گیا۔ اس دوران برآمدات 10.84 فیصد اضافے سے 8.423 ارب ڈالر جبکہ درآمدات 13.21 فیصد اضافے سے 19.215 ارب ڈالر رہیں۔ یہ اعداد ظاہر کرتے ہیں کہ برآمدی آمدنی میں اضافے کے باوجود درآمدات میں زیادہ اضافے سے تجارتی خلا وسیع ہوا ہے۔سینیٹر محمد عبدالقادر نے کہا کہ ستمبر 2026 میں برآمدات گزشتہ سال کے اسی مہینے کے مقابلے میں 17.61 فیصد بڑھ کر 2.939 ارب ڈالر جبکہ درآمدات 11.05 فیصد بڑھ کر 6.494 ارب ڈالر رہیں، جس سے ماہانہ تجارتی خسارہ 3.555 ارب ڈالر بنا۔ اگرچہ ستمبر میں برآمدات کی شرحِ نمو زیادہ رہی، تاہم ڈالر کے لحاظ سے درآمدات میں اضافہ برآمدات کے اضافے سے زیادہ تھا، جس کے باعث تجارتی خسارہ بڑھا۔انہوں نے کہا کہ پائیدار بہتری کے لیے برآمدی آمدنی میں مسلسل اضافہ ضروری ہے۔ صنعتی پیداوار اور برآمدات کے لیے درکار خام مال اور مشینری کی دستیابی برقرار رکھتے ہوئے غیر ضروری درآمدات میں کمی اور مقامی متبادل کی تیاری کو فروغ دیا جائے۔ توانائی کے درآمدی انحصار میں کمی، مقامی وسائل کے موثر استعمال اور توانائی کی بچت کو بھی معاشی پالیسی میں ترجیح دی جائے۔چیئرمین قائمہ کمیٹی نے مزید کہا کہ پاکستان کو زیادہ قدر والی مصنوعات، زرعی پروسیسنگ، انجینئرنگ مصنوعات اور آئی ٹی خدمات کی برآمدات بڑھانے کے ساتھ نئی عالمی منڈیوں تک رسائی پر توجہ دینا ہوگی۔ برآمد کنندگان کو مسابقتی نرخوں پر قابلِ اعتماد توانائی، بروقت ٹیکس ریفنڈز، آسان کاروباری طریقہ? کار اور موثر لاجسٹکس فراہم کرنا ضروری ہے۔انہوں نے کہا کہ تجارتی خسارے کے دباو¿ کو کم کرنے کے لیے حکومت، صنعت اور برآمد کنندگان کے درمیان عملی تعاون بڑھایا جائے۔ برآمدات میں موجودہ بہتری کو مستقل پیش رفت میں تبدیل کرنے کے لیے پالیسی کا تسلسل، مضبوط صنعتی بنیاد اور مصنوعات و منڈیوں میں تنوع ضروری ہے۔ پاکستان کی معاشی مضبوطی کے لیے ایسی برآمدی معیشت تشکیل دینا ہوگی جو روزگار، زرمبادلہ کی آمدنی اور پائیدار ترقی میں مسلسل اضافہ کرے۔