واشنگٹن: ٹرمپ انتظامیہ کی جانب سے عالمی فوجداری عدالت (آئی سی سی) پر  پابندیاں عائد کرنے کی تیاری کا انکشاف ہوا ہے۔

وال اسٹریٹ جرنل نے اتوار کو حکام کے حوالے سے بتایا کہ  ٹرمپ انتظامیہ عالمی فوجداری عدالت  پر پابندیاں عائد کرنے کی تیاری کر رہی ہے۔

وال اسٹریٹ جرنل  کے مطابق ان پابندیوں کے تحت 6 سے 7 ماہ کی مہلت کے بعد عالمی فوجداری عدالت کے ساتھ زیادہ تر لین دین پر پابندی عائد کر دی جائے گی۔

رپورٹ کے مطابق یہ پابندیاں اسرائیلی وزیراعظم نیتن یاہو کے وارنٹ گرفتاری جاری کیے جانے کے بعد عالمی فوجداری عدالت کے خلاف واشنگٹن کی کوششوں میں نمایاں شدت کی عکاسی کرتی ہیں۔

وال اسٹریٹ جرنل کا کہنا ہے کہ دستاویزات اور امریکی حکام کے مطابق ان پابندیوں کے نتیجے میں عدالت کے لیے امریکی ڈالر میں مالی لین دین کرنا ممکن نہیں رہے گا، جس سے اسے عالمی مالیاتی نظام کے بڑے حصے سے الگ کیے جانے کا خدشہ ہے۔

اس اقدام سے عالمی فوجداری عدالت کے کام کو شدید نقصان پہنچ سکتا ہے۔